"Yuventus" "Barselona" markaziy himoyachisi Ronald Arauxo bo'yicha muzokaralarga kirishishni rejalashtirmayapti.

Joriy oy o'rtasiga qadar urugvaylik futbolchining shartnomasida 65 mln evrolik tovon puli bor. Jurnalistlar Matteo Moretto va Fabritsio Romanoning xabar berishicha, "Yuventus" mish-mishlarga qaramay, Arauxo nomzodiga qaytmoqchi emas. Muhokamalar olib borilmayapti, "ko'k-anorranglilar" markaziy himoyachisi "keksa sinora"ning ustuvor maqsadlari qatoriga kiritilmagan.

Ronald Arauxoga yanvar oyidayoq "Yuventus" qiziqish bildirgan, ammo o'shanda "Barselona" bilan yangi uzoq muddatli shartnoma tuzishni ma'qul ko'rgandi. Iyun oyida OAVda 26 yoshli futbolchining Turinga ko'chib o'tishi mumkinligi haqidagi gap-so'zlar yana tarqaldi.