"Barselona" La Liga 4-turidan o'rin olgan o'yinda "Valensiya"ga hech qanday imkoniyat qoldirmadi (6:0). Bahsda Fermin Lopes, Rafinya Dias va Robert Levandovski o'z hisobiga dubl yozib qo'ydi. Braziliyalik va polshalik futbolchi zaxiradan maydonga tushganidan keyin ikki marta gol urishga muvaffaq bo'ldi, biroq o'yinning eng yaxshi futbolchisi sovrinini Fermin qo'lga kiritdi. 22 yoshli ispaniyalik nafaqat ikkita gol urdi, balki jamoadoshlari uchun ikkita yaqqol golli vaziyat yaratdi (eng yaxshi ko'rsatkich), shuningdek, eng ko'p dribling (uchta) amalga oshirdi.

Xans-Diter Flik jamoasi o'n ochko bilan La Liga turnir jadvalida ikkinchi o'rinda bormoqda. Undan yuqorida faqat Madridning "Real"i (12) joylashgan.