“Barselona” klubi prezidenti Joan Laporta klubning sobiq rahbari Xosep Mariya Bartomeuni katta miqdordagi mablag'ni noqonuniy sarflaganlikda ayblab, unga qarshi sudga murojaat qildi. Cadena SER nashrining xabar berishicha, Bartomeu braziliyalik futbolchi Malkom hamda frantsiyalik hujumchi Antuan Grizmanning transferlari jarayonida moliyaviy qonunbuzarliklarga yo'l qo'ygan.Ma'lumotlarga ko'ra, Bartomeu ayrim transferlar bo'yicha komissiya to'lovlarini sun'iy ravishda oshirib ko'rsatgan va mablag'larning bir qismi faqat qog'ozda mavjud bo'lgan soxta firmalarga o'tkazilgan. Xususan, Malkom transferidagi 10 million evro miqdoridagi komissiya to'lovi bunga misol sifatida keltirilmoqda. Qayd etilishicha, ushbu to'lovlar bo'yicha shartnoma Malkomning transferi yakunlanganidan ancha vaqt o'tib imzolangan.Bundan tashqari, Laporta Bartomeuni “Atletiko Madrid” klubiga 15 million evro miqdorida noqonuniy to'lov amalga oshirganlikda ham aybladi. Unga ko'ra, bu mablag' Grizmann bilan bog'liq mojaroni sudgacha etkazmasdan hal qilish uchun to'langan. Sababi, Grizmann “Atletiko” bilan amaldagi shartnomasi mavjud bo'lgan paytda “Barselona” bilan yashirincha muzokaralar olib borgan.Laporta boshchiligidagi klub rahbariyatining ta'kidlashicha, ba'zi transferlar bo'yicha 33 foizlik komissiyalar to'langan. Hattoki, “Barselona”dan pul olish uchun atay maxsus firmalar tashkil etilgan.Eslatib o'tamiz, Xosep Bartomeu “Barselona” klubini 2014 yil yanvaridan 2020 yil oktabrigacha boshqargan. Bungacha u vitse-prezident va boshqaruv kengashi a'zosi sifatida faoliyat yuritgan. Sobiq prezident ushbu ish yuzasidan 24 oktyabr kuni sudda ko'rsatma berishi belgilangan.