"Barselona" La Liga doirasida o'z maydonida "Jirona" ustidan g'alabani ilib ketdi - 2:1. G'alaba golini kataloniyaliklar ikkinchi bo'limga qo'shib berilgan daqiqalarda urishdi. Himoyachi Ronald Arauxo o'zini ko'rsatdi, u ikkinchi bo'lim oxirida zaxiradan maydonga tushgandi. O'yindan keyin "ko'k-anorranglilar" bosh murabbiyi Xans-Diter Flik bu borada izoh berdi.

"Men maydonga tushishdan oldin undan so'radim: "Nima deb o'ylaysan, bu pozitsiyada o'ynay olasanmi?" U "ha" deb javob berdi. Uning golidan juda xursandman - u doim yuragi bilan o'ynaydi," - dedi Flik matbuot anjumanida.

"Barselona" La Ligada "Real"ni 1 ochkoga ortda qoldirib, peshqadamlik qilmoqda. Darvoqe, Madrid jamoasi tur o'yinini yakshanba kuni o'tkazadi.