"Barselona"ning 9 nafar kataloniyalik futbolchisi "Alaves"ga (3:1) qarshi o'yinni asosiy tarkibda boshladi - bu 66 yil ichida Ispaniya chempionatida ilk bor ro'y berdi.

29 noyabr kuni "Barsa" o'zining 126 yilligini nishonladi. Shu kuni Xans-Diter Flik to'qqiz nafar kataloniyalik: Joan Garsiya, Aleks Balde, Pau Kubarsi, Jerar Martin, Erik Garsiya, Mark Kasado, Mark Bernal, Dani Olmo va Lamin Yamalni maydonga tushirdi. Ulardan 7 nafari, Joan Garsiya va Jerar Martindan tashqari, klubning yoshlar akademiyasida tahsil olgan.

RAC1 jurnalisti Oriol Xovening ta'kidlashicha, bu 1959 yildan beri birinchi marta "Barsa"ning asosiy tarkibida to'qqiz nafar kataloniyalik futbolchi chempionat o'yinida maydonga tushgan. Uning qo'shimcha qilishicha, bunday misolni 1937 yilda, Ispaniyadagi fuqarolar urushi paytida Kataloniya chempionatining "Espanol"ga qarshi o'yinida ham ko'rish mumkin.

Avvalroq, "Atletik"ka qarshi o'yinda (4:0) Flik kataloniyaliklarning 9 nafar futbolchisini maydonga tushirgandi. Farq shundaki, "Alaves"ga qarshi o'yinda to'qqiztasi ham asosiy tarkibda maydonga tushdi.