Yarim himoyachi Gavi tizzasidagi muammo tufayli o'tkazilgan jarrohlik amaliyotidan so'ng uzoq vaqt maydonga tusha olmadi. Yaqinda futbolchi etti oylik tanaffusdan keyin safga qaytdi va uchrashuvlarning birida ishtirok etdi — Gavi «Sevilya»ga qarshi o'yinda zaxiradan maydonga tushib, 8 daqiqa va hakam tomonidan qo'shib berilgan vaqt davomida harakat qildi.

ESPN xabariga ko'ra, Gavi Ispaniya terma jamoasining mart oyidagi yig'iniga chaqiruv olishi kutilmoqda.

Agar bu ma'lumot tasdiqlansa, «Barselona» bosh murabbiyi Xans-Diter Flikning bunga qanday munosabat bildirishi qiziq bo'ladi. Ehtimol, germaniyalik mutaxassis bundan mamnun bo'lmas, chunki Gavi hali o'yin ritmiga to'liq kirib ulgurmagan. Avvalroq Flik Ispaniya milliy terma jamoasida Lamin Yamaldan foydalanish tartibidan noroziligini bildirgan edi.