"Barselona" hujumchisi Ferran Torres yanvar oyidan beri davom etib kelayotgan golsiz seriyasiga chek qo'ydi. Uning "quruq" seriyasi barcha turnirlarda ("Barsa" va Ispaniya terma jamoasi safida) 15 ta o'yinga cho'zilgan edi.

La Liganing 31-turi doirasida kechayotgan "Espanol"ga qarshi bahsning birinchi bo'limida (2:0) hujumchi dubl qayd etishga muvaffaq bo'ldi.

Ferran oxirgi marta shu yilning 31 yanvar kuni "Elche" darvozasini ishg'ol qilgan edi (3:1). Hozirda uning hisobida Ispaniya chempionatining joriy mavsumida o'tkazilgan 28 ta o'yinda 14 ta gol mavjud.