"Barselona" bosh murabbiyi Xansi Flik hujumchi Ferran Torresning uzoq kutilgan gollari haqida o'z fikrini bildirdi.

Torres shanba kuni bo'lib o'tgan va "ko'k-anorranglilar"ning yirik g'alabasi (4:1) bilan yakunlangan "Espanol"ga qarshi derbida dubl qayd etdi. Bu Ferran uchun yanvar oyi oxiridan beri urilgan ilk gollar bo'ldi — u klub miqyosida qatorasiga 13 ta o'yinda raqib darvozasini ishg'ol eta olmayotgan edi.

"Albatta, gol urish Ferran uchun juda muhim edi. Hozirda u haqiqatan ham yaxshi holatda — men buni har kuni mashg'ulotlarda ko'rib turibman. Uning uchun juda xursandman. Doim aytganimdek, u gollarga munosib", — deya Flikning so'zlarini keltirmoqda Barca Universal.