«Barselona» markaziy himoyachisi Andreas Kristensen jamoadan ketishni istamayapti. 30 yoshli futbolchi «ko'k-anorranglilar»ning amaldagi shartnomani uzaytirish bo'yicha ilk taklifini rad etgan edi, biroq hozirda yangi muzokaralar olib borilmoqda — tomonlar 2028 yilgacha mo'ljallangan kelishuvni muhokama qilishmoqda.

Mundo Deportivo nashrining ma'lumotlariga ko'ra, boshqa klublar daniyalik futbolchiga moliyaviy jihatdan ancha manfaatliroq shartlar taklif qilishmoqda, ammo o'yinchining ustuvor maqsadi o'zgarmagan — u qolishni afzal ko'rmoqda.

Andreas Kristensen jarohatlar tufayli mavsumning katta qismini o'tkazib yubordi. Tajribali himoyachi joriy mavsumda 17 ta o'yinda maydonga tushib, bitta gol urishga muvaffaq bo'ldi.