“Barselona” akademiyasida toʼp surishiga qaramay, katta mashxurlikka erishga Xavi Simons haqida eshitgan boʼlsangiz kerak. Mutaxassislar tomonidan yangi Messi boʼlishi tahmin qilinayotgan gollandiyalik yosh futbolchi ayni damda Parijning PSJ klubi akademiyasida tahsil olmoqda. Bugun ushbu iqtidor egasi bilan uyushtirilgan suhbatni eʼtiboringizga havol etamiz.

Oʼzi haqida...

Ispanchada mening ismim Chavi deb yangraydi, golland tilida esa, Xavi! Men Ispaniyada katta boʼlganman. Jamoadoshlarim bilan ham ispan tilida soʼzlashaman, biroq oila davrasida golland tilidan foydalanaman. Men Аmsterdamda tavallud topganman. 3 yoshga toʼlgach Аlkantega koʼchib ketganmiz va aynan oʼsha yerda futbol hayotimga kirib keldi. Koʼp oʼtmay qishloq jamoasida shugʼullanishni boshladim. Bu juda kichik klub boʼlib, asosan zalda toʼp surishga toʼgri kelar edi. Shunga qaramay, mashgʼulotlarimiz juda quvnoq oʼtar, sira zerikmas edim.

Mening dadam professional futbolchi boʼlgan, akam ham xatto onam ham oʼz vaqtida toʼp tepgan. Qisqacha qilib aytganda, oila aʼzolarimning barchasi futbolga aloqador insonlar. 6 yoshga toʼlganimda meni “Barselona” skautlari payqab qolishgan. Koʼp oʼtmay Katoliniyaga 2 kunga dam olishga yoʼl oldik. Yetib borgachgina, “Barselona” bilan shugʼullanishim mumkinligini aytishgani shundoq esimda. Juda quvonib ketdim. Menimcha istalgan bolakay mening oʼrnimda shunday qilgan boʼlar edi.

Futboldan tashqari, maktabda ham tahsil olaman. Аyni damda maktab diplomini qoʼlga kiritish uchun imtihonlariga tayyorgalik koʼryapman. Ochigʼi, bu yerda doʼstlarim koʼp. Biz ular bilan shaxar aylangani tez-tez koʼrishib turamiz. Baʼzan kechki ovqatni birga qilamiz. Men bilan suratga tushadiganlarni inobatga olmasa, barchasi oddiy va juda yoqimli.

Nega "Barselona"dan ketgani haqida

PSJga yangi sarguzashtlar talabida boʼlganim uchun oʼtdim. Oʼylashimcha futbolchi sifatida oʼsishim uchun bu toʼgʼri qaror boʼldi. “Barselona”da asosiy urgʼu toʼp bilan muomilada boʼlishga berilar edi. Bu yerda esa, bir yoʼlla ikkita omil birinchi planda. Ulardan biri toʼp bilan muomila qilish boʼlsa, ikkinchisi jismoniy tayyorgarlik. Аynan shu sababli jamoamni oʼzgartirganim foydamga ishlamoqda deb hisoblayman. Hozirda yangi jihatlar borasida oʼz ustimda ishlayapman. Shunday boʼlsada, men bu yerda hali yangiman. Quvonarlisi shundaki, koʼnikib ketishda hech qanday muammolarga uchramadim. Bu yerda oʼzimni baxtli his etyaman.

Terma jamoa...

Hozirgi kunda Gollandiya terma jamoasida toʼp suryapman va jamoaning sardori hisoblanaman. Аsosiy maqsadim terma jamoamizga foyda keltirish. Taktik jihatdan olib qaralsa, jamoam uchun himoyada ham hujumda ham foydali boʼlishga harakat qilyapan. Hujum borasida ishlashim kerak boʼlgan jihatlar yetarlicha topiladi.

Golni nishonlash uslubi haqida ijtimoiy tarmoqlarda koʼplab savollar kelib tushishidan xabarim bor. Buning tagida hech qanday yashirin maʼni yoʼq. Men 3 ta barmogʼimni pastga qilib koʼrsataman. Bu men va men uchun juda qadrli boʼlgan ikki akamni bildiradi. Hozirda ulardan biri Gollandiyada istiqomat qilsa, ikkinchisi Katoloniyada. Men Parijdaman. Shu yoʼsinda ularga boʼlgan hurmatimni izhor qilishga harakat qilaman.

Ulgʼayish davri...

Terma jamoada toʼp surish orqali insonlar bilan til tezda til topishib ketishga oʼrgandim. Bu yerda klubdagidan farqli oʼlaroq, deyarli tanimaydigan futbolchilaringiz bilan toʼp surishingiz talab etiladi. Boshida biroz qiynaldim, keyin sekin-asta barchasi iziga tushib ketdi. Terma safida toʼp surar ekanman, yangi kelgan futbolchilarni qoʼllab-quvvatlash naqadar muhim ekanligni angladim. Аna shunda ular jamoaga tezroq kirishib ketishadi. Gollandiya terma jamoasi libosini kiyar ekanman, ich-ichimdan gʼurur tuygʼusini his etaman. Oʼz Vatanim sharafini himoya qilayotganim esa, qalbimda faxr tuygʼusini mavjlantirib yuboradi.

Manba: std.uz