Xabaringiz bor bugun UEFA Chempionlar ligasining 1/8 finalidan o‘rin olgan yana 2 ta bellashuv bo‘lib o‘tadi. “Napoli” – “Barselona” bahsi shular jumlasidandir.
Biz esa odatdagidek ushbu bellashuv oldidan jamoalarning imkoniyatlarini baholab chiqamiz.
“Napoli” bu mavsum avvalgilaridan ancha sust harakat qilmoqda. Bu jamoa ishtirok etayotgan barcha musobaqalarda ko‘rinib turibdi. Bundan muvaffaqiyatsiz start Karlo Anchelottini bosh murabbiylikdan olinishiga sabab bo‘ldi.
Jamoani mavsum o‘rtasida qabul qilib olgan Jennaro Gattuzo bor kuchi bilan “Napoli” oldiga vazifa qilib qo‘yilgan ECHL yo‘llanmasini qo‘lga kiritishga harakat qilmoqda. Uning bu harakatlari so‘nggi o‘yinlarda o‘z so‘zini aytishni boshladi.
“Napoli” o‘zi o‘tkazgan oxirgi 6 ta o‘yinning 5 tasida zafar quchdi. Eng muhimi ushbu g‘alabalarning 2 tasi chempionat peshqadamlari hisoblangan “Yuventus” va “Inter” ustidan qo‘lga kiritildi. Biroq, jamoa kutilmaganda quyi pog‘onada borayotgan “Lechche”ga yutqazib qo‘ydi.
Gattuzo jamoasida hujum chizig‘i yaxshi ishlayotganini ko‘rish mumkin. Ular oxirgi 6 ta o‘yinda raqiblari darvozasiga jami 12 ta gol urishdi.
Himoyachilar ham hujumchilardan qolishmayapti. “Napoli” so‘nggi 6 ta o‘yinda o‘z darvozasidan 7 ta gol o‘tkazib yubordi xolos. Biroq, bugungi bellashuvda jamoaning asosiy hujumchisi Kalidu Kulibali ishtirok etolmaydi. Boisi, Gattuzo uni o‘yin qaydnomasiga kiritmadi.
Eslatib o‘tamiz, “Napoli” Chempionlar ligasining guruh bosqichida “E” guruhida bahs olib bordi va yakunda “Liverpul”dan so‘ng 2-o‘rin bilan pley-offga yo‘llanmani qo‘lga kiritdi.
“Napoli”ning so‘nggi 6 ta o‘yinda qayd etgan natijalari:
“Napoli” – “Yuventus” 2:1
“Sampdoriya” – “Napoli” 2:4
“Napoli” – “Lechche” 2:4
“Inter” – “Napoli” 0:1
“Kalyari” – “Inter” 0:1
“Breshia” – “Napoli” 1:2
“Barselona” ham xuddi “Napoli” kabi mavsum o‘rtasida bosh murabbiyni almashtirdi. 2017 yildan buyon jamoani boshqarib kelayotgan Ernesto Valverde ketma-ket muvaffaqiyatsizliklardan so‘ng iste’foga chiqarildi.
Shundan so‘ng “Barsa” bosh murabbiyligiga kutilmaganda Kike Seten taklif qilindi. Hozircha Setenning jamoa o‘yinini qay darajada o‘zgartira olganini yaqqon sezish qiyin. Balkim, vaqt o‘tishi bilan u jamoada o‘z uslubini yarata olar. Har holda bunga vaqt kerak.
Kataloniyaliklar oxirgi 6 ta o‘yinning 5 tasida g‘alaba qozonishdi va faqat “Atletik”ga qarshi kechgan Bilbaodagi o‘yinda 1:0 hisobida yutqazib qo‘yishdi.
“Barselona” so‘nggi o‘yinlarda raqiblari darvozasiga juda ko‘p gol urmoqda. Ular so‘nggi 6 ta bahsda jami 17 ta gol urishdi. Shu bois jamoaning hujum chizig‘ida jiddiy yo‘qotishlar bo‘lishiga qaramay hamon kuchli ekanini ko‘rish mumkin. Ayniqsa, “Napoli” himoyachilari Lionel Messidan ehtiyot bo‘lishlari lozim. 32 yoshli argentinalik futbolchi “Eybar”ga qarshi bo‘lib o‘tgan oxirgi turda poker qayd etishga erishdi.
“Ko‘k-anor ranglilar” o‘z himoya chiziqlari bilan ham maqtansalar arziydi. Boisi, jamoa so‘nggi 6 ta bahsda bor yo‘g‘i 5 ta gol o‘tkazib yuborgan xolos.
Eslatib o‘tamiz, “Barselona” Chempionlar ligasining guruh bosqichida “F” guruhida bahs olib bordi va birorta o‘yinda mag‘lub bo‘lmagan holda 1-o‘rin bilan pley-offga chiqdi.
“Barselona”ning so‘nggi 6 ta o‘yinda qayd etgan natijalari:
“Barselona” – “Leganes” 5:0
“Barselona” – “Levante” 2:1
“Atletik” – “Barselona” 1:0
“Betis” – “Barselona” 2:3
“Barselona” – “Xetafe” 2:1
“Barselona” – “Eybar” 5:0
"Napoli" va "Barselona" jamoalarining so‘nggi uchrashuvi 2019 yilning 11 avgust kuni bo‘lib o‘tgan edi. O‘sha o‘yinda kataloniyaliklar 4:0 hisobida g‘alaba qozonishgan.
Xulosa qiladigan bo‘lsak, ushbu o‘yinda favorit “Barselona”. Ammo, so‘nggi bellashuvlarda ajoyib natijalar qayd etayotgan “Napoli”dan ham har narsa kutish mumkin. Chunki, ular o‘z maydonlarida harakat qilishadi. Gollar masalasida ham shuni aytish mumkin: har ikkala jamoa ham gol uradi.
Eslatib o‘tamiz, “Napoli” – “Barselona” uchrashuvi bugun 01:00 da boshlanadi. Javob bahsi esa 19 mart kuni “Kamp Nou”da bo‘lib o‘tadi.
Manba: sports.uz