Terma jamoamizning o‘yiniga nazar
Taniqli sport sharhlovchisi Mirzahakim To‘xtamirzaev SPORTS.uz saytida o‘z dasturiga egaligidan ko‘pchilikning xabari bor. Tajribali jurnalist bu safar O‘zbekiston milliy terma jamoasining o‘yini, natijalari, Ektor Kuper, Vadim Abramov va uning kashfiyoti haqida gapirdi.
-Man siz-u biz kutgandek O‘zbekiston milliy terma jamoasi JCh-2022 ikkinchi saralash bosqichi peshqadamiga aylandi. Rosti Ektor Kuper davrida Falastin bilan uchrashuvni boy berganimizdan so‘ng yana ikki tur o‘tgach yurtdoshlarimiz musobaqa jadvalida 1-o‘rinda turadi desa ishongingiz kelmasdi. Ammo Vadim Abramov O‘zbekiston milliy terma jamoasiga tayinlandi va terma jamoamizning o‘yinida, natijalarida keskin o‘zgarishlar ko‘zga tashlanmoqda. Bu tasodifmi degan savolga hamma o‘zicha javob berishi mumkin. Kimdir ha endi Yaman va Singapurni yutmasak endi kimni yutamiz degan fikrni bildirishi mumkin. Lekin biz Falastinga ham hech qachon yutqazmagan edik va hattoki o‘z darvozamizdan to‘p o‘tkazib yubormaganmiz.
Toshkentda Yaman bilan bo‘lgan uchrashuvni muhokama qilmagan muxlis qolmadi. Ayniqsa, Vadim Abramov tanlagan taktika ko‘pchilikning muhokamasiga sabab bo‘ldi. Chindan ham Ektor Kuper yosh yarim himoyachi Sanjar Qodirqulovni terma jamoaga chaqirishini tasavvur qilib bo‘lmasdi. Vadim Abramov o‘z klubi vakilini terma jamoaga tortdi. Agar o‘sha kuni Sanjarning o‘yini qo‘vushmaganda, birinchi navbatda barcha e’tirozlar futbolchiga emas, murabbiyga yog‘dirilardi. Biroq terma jamoamiz debyutanti dastlabki daqiqalardan o‘yinga kirishib ketdi, qaerdadir omad balki o‘z so‘zini aytgandir. Lekin omad kuchlilarga kulib boqadi deyishadi. Sanjar gol urdi, assistentlik qildi, o‘sha kunning kashfiyotiga aylandi.vaholanki, dastlabki golni urganidan so‘ng ismini aytib, familiyasini muxlislar aytadi deb kutgan hamkasbimiz noqulay ahvolga tushib qolgani bor gap. Muxlislarimiz Sanjar Qodirqulovligini anglab etguncha, u darvozani ishg‘ol etib bo‘lgandi.
Yana bir tarafi. O‘sha kuni Jamshid Iskanderovni tarkibda kutganmidingiz? Bundan bir oy avval terma jamoamiz ochiq futbol namoyish etishini tasavvur qila olmasdik.
Quvontirgan yana bir jihati, Igor Sergeevning oxirgi daqiqalarda zaxiradan tushirilishi va u gol urgani bo‘ldi. Ma’lum muddat terma jamoadagi o‘yini qovush-qovushmasa, gol ursa-urmasa ham maydonga tushiraverilib, muxlislarga yoqmay qolgandi. Lekin u iste’dodli hujumchi va hali siz-u bizga quvonchli lahzalarni taqdim etishi mumkin, - dedi Mirzahakim To‘xtamirzaev.