«Atletiko» bosh murabbiyi Diego Simeone Ispaniya La ligasining 10-turi doirasida bo'lib o'tgan «Barselona»ga qarshi o'yin (1:0) borasida o'z fikrini bildirib o'tdi. «Futbolda uchrashuvdan uchrashuvga harakatlanish kerak. Ba'zida g'alaba qozonamiz, ba'zida mag'lub bo'lamiz. "Barsa"ga qarshi so'nggi o'yinlarda biz hamisha g'alabaga yaqin bo'lgan edik.Jamoaning harakatlaridan qoniqish hosil qildim. Jamoa himoyada va hujumda qanday o'ynash kerakligini yaxshi tushundi. Bizda yaxshi imkoniyatlar bo'ldi. Masalan, Lorente gol urishi mumkin edi. Urilgan gol bizga xotirjam harakat qilishga imkon berdi. Ammo «Barselona»da g'alaba qozonish uchun hamisha imkoniyat bo'ladi. Bizda yaxshi o'yinchilar yig'ilganini anchadan beri aytib kelyapman. Bu esa bizdan kutayotgan natijani qayd etish uchun imkoniyat beradi. G'oyalar va ijrochilar o'rtasida bog'liqlik bo'larkan, ajoyib narsa yuzaga keladi», — dedi Simeone.«Atletiko» Ispaniya chempionatida ketma-ket 5ta o'yindan beri g'alaba qozonib kelmoqda. Jamoa 20 ochko bilan jadvalda 2-o'ringa ko'tarilib oldi. «Barselona» esa 11 ochko bilan 10-pog'onada bormoqda.