Messidek futbolchining ketishi asta sekin bo'lishi shart. Mana shunday.

U «Barselona»ni tark etyapti, katta ehtimol bilan Frantsiya chempionatida to'p suradi. Ha, La Ligamas, u qadar qiziqish bilan tomosha qilmaymiz, ammo Messini sog'insak, PSJ ni o'yinlarini ko'rishimiz mumkin. Chempionlar Ligasi bo'ladi, katta turnir, hammaning e'tiborida.

Balki ikki yil o'tib AQShga borar, MLS ni ko'rmasak ham, gollari ijtimoiy tarmoqlarda aylanadi, «Messi jarimadan zo'r gol uribdi» degan gaplar eshitib turamiz. Argentina terma jamoasi ham bor, darvoqe...

Yoki Qatarga borar, «Paxtakor» bilan OChLda o'ynagani kelar, yoki Kanidja kabi zaxira o'rindig'ida uzoqdan ko'rib qolarmiz.

Xuddi shu holatda, sekin asta Messi degan futbolchi nazarimizdan yo'qolib boradi. Oson ko'nikamiz, yangi yulduzlar, katta o'yinlar Messisiz o'tishi oddiy holga aylanadi.

Endi tasavvur qiling, xuddi shu bugun, mana shunday matbuot anjumani va rasmiy xabarlar bilan Messi futboldan ketganida.

«Barselona»dan emas, futboldan ketganida...

Yaxshiyam unday emas.

Qahramon Aslanov