«Bunyodkor» - «Navbahor» (2:1) o‘yinidan so‘ng mezbonlar bosh murabbiyi Vadim Abramov uchrashuv haqidagi fikrlari bilan o‘rtoqlashdi.
«O‘yinni juda yaxshi boshladik. Raqibdan ko‘ra, g‘alabaga haqliroq edik. O‘ylaymanki, bugungi natija adolatli bo‘ldi.
Himoya chizig‘idagi muammolar? O‘zbek futbolidagi kamchiliklardan biri bu - hujumni boshlay oladigan markaziy himoyachilarning yo‘qligidir. O‘zbekistonga keladigan raqib himoyachilari to‘p bilan juda yaxshi ishlashadi, bizda esa to‘pni himoyada saqlashda ham ko‘p xatolik kuzatiladi. Shu bois yarimhimoyachilarni markaziy himoyada sinayman. Umuman olganda, faqat men emas, hattoki Gvardiola ham shu yo‘lni tanlamoqda. Ko‘rayapsizlar, u ham yarimhimoyadagi Fernandinoni himoyada o‘ynatmoqda. Faqatki, u bu tajribani mendan 6-7 yil kechikib boshladi.
Keyingi turdagi «Paxtakor»ga qarshi o‘yin? «Paxtakor» bu yil hali mag‘lubiyatga uchragani yo‘q. Kelasi turda biz bu vazifani uddalashga intilamiz.
Bu mavsumda hakamlik borasida o‘sish bo‘ldi. Buni tan olish kerak. Kichik xatolar kuzatildi, ammo natijalarga jiddiy ta’sir qiluvchi hakamlik bo‘lmadi.
Yodingizda bo‘lsa, «Lokomotiv»dan milliy terma jamoaga ketganimda ikkala joyda ishlashim mumkin edi. Biroq, o‘shanda bu noto‘g‘ri bo‘lishini o‘ylab, klubdan ketgandim. Hozir esa «Bunyodkor»da qolsam to‘g‘ri bo‘lishini his qilayapman. Sababi chempionatda raqobat yuzaga keltirsak terma jamoaga yaxshi bo‘ladi. Aks holda terma jamoa faqat «Paxtakor» futbolchilariga bog‘liq bo‘lib qolishi mumkin. Klubda ham ishlash shaxsan menga xalal berayotgani yo‘q», - deydi Vadim Karlenovich.