Lionel Messi "Barselona"ga qaytadigan bo'lsa, klub bosh murabbiyi Xavi uni qaysi pozitsiyada o'ynatish masalasini futbolchi bilan muhokama qilmoqda. Bu haqda jurnalist Gilem Balage xabar tarqatdi.«Leo va Laporta hozircha o'zaro gaplashishmadi. Ammo «Barselona» Messini ortga qaytarishni rejalashtirmoqda. Bosh murabbiy Xavi esa Messi bilan muntazam gaplashib turibdi hamda jamoaga uning xizmatlari kerak ekanini aniq-ravshan tushuntirib bermoqda. Xavi Leoni tayanch yarim himoyachisidan oldingi ikki yarim himoyachilardan biri sifatida o'ynatmoqchi. Messi Argentina terma jamoasida shunga yaqin pozitsiyada o'ynagandi. Buning uchun Xavi turli g'oyalarni o'ylab qo'ydi. Lionel murabbiyning fikrlarini har safar tinglaganda ko'zlari porlab ketmoqda. Ammo "Barsa" rahbariyatining matbuotdagi fikrlarini o'qib, hafsalasi pir bo'layotgan bo'lishi mumkin», – deya yozdi Balage.