Ispaniyadagi chempionlik poygasi haqida nimalarni bilamiz? Asosan, bu "Real" va "Barselona" o'rtasidagi an'anaviy qarama-qarshilik. Kamdan-kam hollarda chempionlik poygasining darajasi oshib bormoqda va chempionlik taqdirini faqat bitta o'yin hal qilib qo'yishi mumkin. Bugun biz kamtarin "Tenerife" qanday qilib "Real"ni La Liga chempionligidan mahrum qilgani haqida fikr yuritamiz.

1991-1992 yilgi mavsumda "qaymoqranglilar" ettinchi turda birinchi o'ringa ko'tarilib, mavsum davomida nafaqat sermahsul futbol namoyish etishdi, balki, himoyada ham yaxshi o'yin ko'rsatib, turnir jadvalini boshqarib borishdi. Ammo, mavsum yakuniga etib borayotgan pallada madridliklar ochko tarqatishni boshlashadi. Shu bilan birga, Yoxan Kroyff boshchiligidagi "Barselona" dastlabki 5 turda 3 marta mag'lub bo'ldi, keyin esa o'z o'yinini topib, sekin-asta ikkinchi o'rinni mustahkamlab oldi va "Real" bilan oradagi farqni minimal darajaga tushirdi.

Oxirgi turda madridliklar birinchi o'rinni egallab, "Barselona"dan atigi 1 ochkoga ("Real" 54 va "Barselona" esa 53 ochkoga ega edi, o'sha paytda g'alaba uchun 2 ochko berilgan) oldinda edi. O'zaro uchrashuvlarda ham tenglik edi - 1:1, 1:1, to'p farqi "qaymoqranlilar" foydasiga edi. "Real" so'nggi turda turnir jadval o'rtasida turgan va hech qanday sovringa da'vo qilmagan kamtarona "Tenerife" ustidan g'alaba qozonishi kerak edi.

"Qirollik klubi" 8-daqiqada hisobni ochdi, keyin esa ikkinchi golni kiritdi va birinchi bo'lim oxirida o'tkazib yuborilgan golga qaramay, "Real" butun o'yin davomida ustunlik qildi. "Barselona" o'z navbatida "Atletik" (Bilbao)ni 2:0 hisobida mag'lub etdi, shuning uchun "Real"dan hech bo'lmaganda gol o'tkazib yubormaslik talab qilindi, ammo madridliklar bu vazifani uddalay olishmadi. 77-daqiqada “qaymoqranglilar” himoyachisi Rikardo Rosha raqib futbolchisining uzatmasidan so'ng avtogol muallifiga aylandi, oradan bir daqiqa o'tib afsonaviy sardor Manolo Sanchis "Tenerife" futbolchilarining bosimi ostida darvozabonga muvaffaqiyatsiz uzatma berdi, kutilmaganda berilgan zarbadan keyin to'p chamasi 40 metrga uchib ketdi va darvoza to'siniga tegib qaytgandan so'ng, "Tenerife" klubining hujumkor o'yinchisi to'pni bo'sh darvozaga kiritishga muvaffaq bo'ldi. Yakunda "Real" 2:3 hisobida mag'lubiyatga uchradi.

"Barselona" g'alabani nishonladi, madridliklarning esa hafsalasi pir bo'ldi. G'alaba madridliklarning qo'lida edi, ammo o'yin taqdirini ikkita qiziq vaziyat hal qildi. Hammasi bunday yakunlanishini hech kim kutmagandi...

1992-1993 yilgi mavsumda "Barselona" mavsumning katta qismida birinchi va ikkinchi o'rinda yurdi. "Real" mavsumni yaxshi boshlay olmadi, ammo keyinroq o'z o'yinini topib, mavsumning qolgan qismini uchinchi va ikkinchi o'rinlar oralig'ida o'tkazdi. 35-turda "qaymoqranglilar" butun mavsum davomida birinchi marta birinchi pog'onani egalladi, "Barselona" ikkinchi pog'onaga tushib ketdi.

Mana syurpriz! "Real" raqibi - "Tenerife". Bu safar ham safarda o'ynaydi.

"Qaymoqranglilar" birinchi bo'limda ikkita gol o'tkazib yuborib, orolliklarga 0:2 hisobida yutqazgan bo'lsa, "Barselona" "Real Sosedad"ni 1:0 hisobida mag'lub etdi. Kataloniyaliklar yana chempion, Madridda esa qayg'u yana.

Shu tariqa, "Real" o'z tarixida ikki marta "Tenerife" jamoasiga hal qiluvchi pallada mag'lub bo'lib, chempionlikdan mahrum bo'lgandi.