Kataloniyaning "Barselona" jamoasida bu mavsum avlodlar almashinuvining cho'qqisi kuzatilmoqda - jamoani 2022/23 yilgacha Jerar Pike (faoliyatini yakunladi), Serxio Buskets va Jordi Alba tark etishi aniq bo'lib ulgurdi. Keling, quyida jamoaga 2014/15 yilgi mavsumda Evropa Chempionlar ligasi sovrinini olib bergan futbolchilar qaerda ekanligini eslab o'tamiz.

Mark-Andre ter Shtegen - "Barselona"da

"Barselona" safiga aynan o'sha mavsum boshida kelib qo'shilgan Ter Shtegen hozirgi kunda jamoaning asosiy etakchilisi desak mubolag'a bo'lmaydi. Aynan uning superseyvlari sabab bu mavsumda La Ligani qo'lga kiritdi. Shu vaqtgacha "ko'k-anorranglilar" safida nemis kiperi 375 ta o'yin o'tkazgan. U bu bahslarda 367 ta gol qo'yib yuborgan bo'lsa, 156 matchda o'z darvozasi daxlsizligini saqlab qolgan.

Maskerano - hozirda Argentina U-20 bosh murabbiyi

"Liverpul" safidagi o'yinlari orqali "Barselona"ga o'tgan Xaver Maskerano ayni vaqtda murabbiylik faoliyatini boshlab yuborgan. U ayni vaqtda vatani Argentinada bo'lib o'tayotgan U-20 jahon chempionatida o'z mamlakati yosh futbolchilariga ustozlik qilmoqda.

Jerar Pike - faoliyatini yakunladi

Joriy mavsumda "Barselona"da Ronald Arauxo, Andreas Kristensen, Jyul Kunde kabi futbolchilarga raqobatda yutqazib qo'ygan va jamoa zaxira o'rindig'iga mixlangan Pike 2023 yilning yanvar oyida faoliyatini tugatganini e'lon qildi. "Mr President" ayni vaqtda "Andorra" klubining egasi va bir qator yirik bizneslarga rahbarlik qiladi.

Jordi Alba - "Barselona" (mavsum yakunida ketadi)

Kuni kecha "Barselona"ni tark etishi aniq bo'lgan Jordi Alba ham huddi Pike singari raqobatda yosh Aleks Baldega yutqazib qo'ydi. Shuningdek, Markos Alonsoning transferi ham Albaning asosiy tarkibdan o'rin olishini qiyinlashtirib yubordi. Natijada u 34 yoshida o'zi tarbiya topgan klubni tark etishga qaror qildi. Jordi shu kunga qadar "Barsa" uchun 458 ta o'yinda 27 ta gol urib, 99 ta golli uzatma bergan.

Dani Alves - Qamoqda

Braziliyalik mashhur qanot himoyachisi Dani Alves hozirgi kunda qamoqda. U Barselonadagi tungi klublardan birida yosh ayolga nisbatan shilqimlik qilishda ayblanib, hibsga olingan.

Andeas Inesta - "Vissel Kobe" (mavsum yakunida ketadi)

Afsonaviy ispaniyalik yarim himoyachi Andreas Inesta bugun, 25 may kuni faoliyatida "Barselona"dan keyingi ikkinchi klub bo'lgan Yaponiyaning "Vissel Kobe" jamoasini tark etishini e'lon qildi. 39 yoshli xavbek faoliyatini davom ettiradimi yoki yo'q hozircha noma'lum.

Ivan Rakitich - "Sevilya"

"Barselona"dagi pushka zarbalari bilan kataloniyaliklarning yoqimtoyiga aylangan Rakitich hozirda La Ligada "Sevilya"ning asosiy futbolchilaridan biri hisoblanadi. U jamoasi bilan 31 may kuni "Roma"ga qarshi Evropa ligasi finalida o'yin o'tkazadi.

Buskets - "Barselona" (mavsum yakunida ketadi)

"Ko'k-anorranglilar"ning markazdagi asosiy tayanchi hisoblangan Buskets Albadan bir necha kun avval "Barsa"dan ketishini e'lon qilgandi. Uning keyingi klubi Saudiya Arabistonidan bo'lsa ajab emas, chunki arab shayxlari Busiga juda katta maosh taklif qilmoqda.

Neymar - "PSJ"

2017 yilda futbol olami uchun rekord miqdor 222 million evro evaziga "Barselona"dan "PSJ" safiga ko'chib o'tgan braziliyalik superiqtidor Neymar hozirda ham parijliklar sharafini himoya qilmoqda. Biroq u muntazam jarohatlar sabab "PSJ" rahbarlarining hafsalasini pir qilgan ko'rinadi, ular yozda Neymar bilan xayrlashishga tayyorligi haqida bir nechta frantsuz nashrlari xabar berdi.

Luis Suares - "Gremio"

"Barselona"dan keyin "Atletiko Madrid" va "Nasonal" kabi klublar sharafini himoya qilgan Luis Suares hozirda faoliyatini Braziliyada davom ettirmoqda. U garchi 36 yoshda bo'lishiga qaramay, "Gremio"da o'zini to'purarlik mahoratini ko'rsatishda davom etmoqda. U joriy mavsumda 22 ta o'yinda 11 ta gol urdi va 6 ta golli uzatma berdi.

Lionel Messi - "PSJ"

Argentinalik superyulduz Lionel Messi 2021 yilda moliyaviy qiyinchiliklar sabab "Barselona"ni tark etgandi. Hozirda 36 yoshni qarshilagan Leo "PSJ" bilan yangi shartnoma imzolamasligi allaqachon ma'lum bo'lib ulgurdi. U bor e'tiborini "Barselona"ga qaytishga qaratgan, biroq yana o'sha muammolar sabab bu ish amalga oshmasligi mumkin.

Abduburxon Mamajonov