Madridning "Atletiko" klubi Joau Feliksni "Barselona"ga qo'yib yuborishga rozi bo'ldi. AS xabariga ko'ra, "matraschilar" 23 yoshli portugaliyalik futbolchini keyinchalik sotib olish sharti bilan "Kamp Nou"ga ijaraga qo'yib yuborishga tayyor.

Avvalroq Joau Feliks har doim "Barselona"da o'ynashni orzu qilganini aytgandi.

Nufuzli Transfermarkt portali mutaxassislari Joau Feliksni 50 million evroga baholamoqda. Portugaliyalik hujumchi o'tgan mavsumning ikkinchi qismini Angliyaning "Chelsi"sida ijara asosida o'tkazdi.

Eslatib o'tamiz, o'tgan mavsumda "Barselona" so'nggi 4 yil ichida ilk bor Ispaniya chempioniga aylangandi.