Madridning "Real" klubi yarim himoyachisi Aurelien Tchuameni "El-Klasiko"dan so'ng klub shifoxonasiga yotqizildi. Matbuot "Barselona" futbolchisi Gavi Tchuamenining oyog'iga bosib olgan vaziyatni muhokama qila boshladi. "Qirollik klubi" yarim himoyachisi bu borada fikr bildirdi.

"Bu Gavining aybi emas. Birinchi bo'lim oxirida jarohat oldim", — deb post qoldirdi Tchuameni ijtimoiy tarmoqda.

Eslatib o'tamiz, shanba kuni Madridning "Real" klubi mehmonda "Barselona"ni 2:1 hisobida mag'lub etgandi. Madridliklar tarkibida Jud Bellingem dubl qayd etdi.

"Real Madrid" ayni damda Ispaniya chempionati turnir jadvalida birinchi o'rinni egallab turibdi.