Jerar Martin «Barselona»dagi hayratlanarli seriyasini davom ettirdi. 24 yoshli futbolchi La Liganing shanba kungi bahsida «Osasuna» ustidan qozonilgan g'alabada (2:1) jamoasiga yordam berdi va o'yinni to'liq o'tkazdi.

Barca Universal nashrining qayd etishicha, Martin markaziy himoyachi sifatida asosiy tarkibda maydonga tushgan joriy mavsumdagi 26 ta o'yinning 25 tasida «ko'k-anorranglilar» g'alaba qozonishgan. Chempionat doirasida esa futbolchi mukammal ko'rsatkichga ega — u asosiy tarkibda tushgan 17 ta o'yinning barchasida (17/17) jamoa zafar quchgan.

Joriy yakshanba kuniyoq «Barselona» muddatidan oldin La Liga g'olibiga aylanishi mumkin. Buning uchun Madridning «Real» klubi safarda «Espanol»ga qarshi kechadigan bahsda ochko yo'qotishi kifoya.