Bir necha kundan keyin qishki transfer oynasi ochiladi. Klublar bir oy davomida tarkibni kuchaytirish ustida ishlashlari mumkin. Odatda yanvar oyida katta bitimlar tuzilmaydi, lekin ba'zi o'yinchilar o'zgarishlarga muhtoj. Keling, yanvar oyida klubini o'zgartirishi mumkin bo'lgan futbolchilarni ko'rib chiqamiz.

Donni van de Bek (“Manchester Yunayted”)

Van de Bekning "Manchester Yunayted"dagi butun davri falokatli o'tdi. Donni 2020 yilda "Ayaks"dan 39 million evro evaziga mankunianliklar safiga o'tgan edi. O'shandan beri u "Yunayted" safida bor-yo'g'i 62 ta o'yinda maydonga tushdi. “Everton”dagi ijara ham futbolchiga yordam bermadi. 26 yoshli yarim himoyachi joriy mavsumda Liga kubogida atigi 21 daqiqa, Premer-ligada esa bir daqiqa o'ynadi. Mish-mishlarga ko'ra, van de Bek "Ayntraxt"ga ijara asosida o'tadi, ammo bu ma'lumot hozircha rasman tasdiqlanmagan.

Kalvin Fillips ("Manchester Siti")

Fillips “Manchester Siti” bilan treblni qo'lga kiritdi, shuning uchun uning Pep Gvardiola jamoasiga o'tishini muvaffaqiyatsiz deb bo'lmaydi. Ammo o'yin vaqtiga kelsak, hammasi juda yomon. Kalvin endi "Etihad"dagi ikkinchi mavsumini o'tkazmoqda va u uchun vaziyat unchalik o'zgarmadi. Oxirgi mavsumda u har bir o'yinda o'rtacha 24 daqiqani maydonda o'tkazgan bo'lsa, hozirgisida - 22. Bundan tashqari, joriy mavsumda u atigi 4 marta maydonga tushdi. "Manchester Siti" Fillips uchun "Lids"ga deyarli 50 million evro to'lagan, ammo futbolchi "Etihad"da chuqur zaxirada. Biror narsani o'zgartirish vaqti keldi. 28 yoshli yarim himoyachi yanvarda “shaharliklar”ni tark etishi ehtimoli yuqori. Unga "Yuventus", "Nyukasl", "Everton" va "Kristal Pelas" qiziqish bildirmoqda.

Ivan Touni ("Brentford")

Touni bir necha oydan beri ingliz top-klublari bilan faol aloqada. “Brentford” bosh murabbiyi Tomas Frank klub futbolchini yanvar oyidayoq sotishi mumkinligini tasdiqlaganidan keyin mish-mishlar kuchaydi. “Arsenal” va “Chelsi” 27 yoshli hujumchi uchun asosiy da'vogarlar. U o'tgan mavsumda Premer-ligada 20 ta gol urib, katta klublar e'tiborini tortdi.

Timo Verner (“RB Leyptsig”)

Verner "Chelsi"da yaxshi davrni o'tkazmadi, Premer-ligada 2 mavsum davomida atigi 10 ta gol urdi. 2022 yilning yozida Timo “RB Leyptsig”ga qaytdi, u avvalroq Bundesligada 20+ gol urgan edi. O'tgan mavsumda 27 yoshli hujumchi Bundesligada 9 ta golurdi. Nemis futbolchisi yana "Leyptsig"dan ketish niyatida. Bosh murabbiy Marko Rouz futbolchiga tanlash huquqini berdi. Mish-mishlarga ko'ra, unga "Manchester Yunayted" va "Vest Xem" qiziqish bildirmoqda.

Oriol Romeu (“Barselona”)

O'tgan yozda "Barselona" Romeuni "Jirona"dan 3,4 million evro evaziga sotib olgandi. Bu transfer dastlab shubhali ko'rindi, ammo vaqt o'tishi bilan bu qo'rquvlar tasdiqlana boshladi. Ispaniyalik futbolchi Kataloniya klubida asosiy tarkibda maydonga tushdi, biroq sentyabr oyi oxiridan beri u kamroq o'yin o'tkaza boshladi. "Almeriya"ga qarshi o'yinda 32 yoshli yarim himoyachi 23 daqiqa harakat qilgan, bungacha esa ketma-ket 3 uchrashuvni zaxirada o'tkazgan. Jamoa Romeuga ortiqcha umid qilmayotgani aniq bo'ldi. Shu bilan birga, "Jirona" futbolchini o'z safiga qaytarish istagi borligini ma'lum qildi. Mavsumning faqat yarmi o'tgan bo'lsa-da, balki "Barselona" “oq-qizillar” bilan yana bir kelishuv haqida o'ylashi kerak.

Doniell Malen (“Borussiya D”)

Dekabr oyida Malen "Borussiya"ni tark etmoqchi ekanligi haqida ma'lumotlar paydo bo'la boshladi. Uning yanvar oyidayoq ketishi istisno etilmadi. "Liverpul" va "Manchester Yunayted" uni o'z safiga qo'shib olmoqchi. Hattoki, “Manchester Yunayted” “bamblar”ga Jeydon Sanchoni niderlandiyalik futbolchiga almashtirishni taklif qilgani xabar qilingandi. Keyinroq nemis klubi sport direktori Sebastyan Kel “Borussiya” Sanchoni qaytarish haqida o'ylamayotganini aytdi.

Karlos Soler (“PSJ”)

Frantsiya OAVlarining yozishicha, “PSJ” bosh murabbiyi Luis Enrike Soler bilan hisoblashmayapti. Bu Karlosning o'yin vaqtida ham seziladi. Chempionlar ligasi guruh bosqichida 26 yoshli yarim himoyachi atigi 1 daqiqa o'ynadi. Liga 1da esa u har bir uchrashuvga o'rtacha 34 daqiqani maydonda o'tkazadi, bu uning faoliyatidagi eng yomon ko'rsatkichdir. Ispaniyalik futbolchi yanvarda parijliklarni tark etishi ehtimoli bor. "Brayton", "Aston Villa" va bir qancha ispan klublari uni o'z safiga qo'shishga qiziqish bildirmoqda, jumladan, "Valensiya" ham.