"Barselona"ning sobiq himoyachisi Jerar Pike korruptsiya ishi bo'yicha ko'rsatma berish uchun sudga chaqirildi. Bu haqda Marca nashri xabar bermoqda.Gap Ispaniya qirollik futbol federatsiyasi (RFEF)dagi ehtimoliy korruptsiya va mamlakat Superkubogining Saudiya Arabistonida tashkil etilishi bilan bog'liq tergov haqida ketmoqda. Pike 14 mart kuni sudda ko'rsatma beradi.2019 yil sentyabrida RFEF Saudiya Arabistoni bilan Ispaniya Superkubogini mamlakat hududida o'tkazish bo'yicha olti yillik shartnoma imzolagan. Umumiy qiymati 240 million evro bo'lgan kelishuvga ko'ra, har yili 40 million evro to'lanishi belgilangan. Bu mablag' federatsiya, klublar va Pikening rahbarligidagi Kosmos agentligi o'rtasida taqsimlanishi kerak edi. Kompaniya o'z xizmatlari uchun taxminan 24 million evro olgan. Keyinchalik, agentlikning ushbu shartnomadagi ishtiroki yashirilmoqchi bo'lgan.Mutaxassislar ta'kidlashicha, Saudiya kompaniyasidan Kosmos hisob raqamiga tushgan mablag'larning katta qismi shu guruhga tegishli yoki unga bog'liq hisob raqamlariga o'tkazilgan. Shuningdek, Pike o'z shaxsiy hisob raqamlaridan to'lovlar amalga oshirib, mablag'lar harakatini kuzatishni qiyinlashtirgan bo'lishi mumkinligi ham da'vo qilinmoqda.