"Barselona" bosh murabbiyi Xans-Diter Flik jamoaning mag'lubiyatsiz seriyasi haqida o'z fikrlari bilan o'rtoqlashdi.

"Ko'k-anorranglilar" 15 o'yindan beri mag'lubiyatga uchramayapti. Jamoa oxirgi marta dekabr oyida "Atletiko"ga qarshi o'yinda (1:2) mag'lub bo'lgandi.

"Yanvar va fevral oyidagi natijalar meni hayratda qoldirdimi? Bu jamoa bilan meni hech narsa ajablantirmaydi. Biz o'z darajamizda bo'lsak, hamma narsa ro'y berishi mumkin. Biz yaxshi o'ynaymiz va bor e'tiborimizni har bir o'yinga qaratamiz" - dedi Flik matbuot anjumanida.

26-turdan keyin "Barselona" 57 ochko bilan Ispaniya chempionati turnir jadvalida peshqadamlik qilmoqda. Flik jamoasi navbatdagi o'yinni 5 mart kuni "Benfika"ga qarshi o'tkazadi.