Seshanba oqshomida "Inter" va "Barselona" yarim finalning javob uchrashuvida Chempionlar ligasi finali yo'llanmasi uchun o'ynaydi. Kataloniya jamoasi bosh murabbiyi Xans-Diter Flik Robert Levandovskining holati haqida gapirdi.

Nemis mutaxassisi polshalik hujumchi asosiy tarkibda maydonga tushmasligini tasdiqladi.

"Kecha gaplashdik. Hammasi yaxshi ketmoqda. Levandovski zaxirada maydonga tushishga tayyor. Agar u bizga kerak bo'lsa, maydonga tushadi. U o'zini yaxshi his qilmoqda va kerak bo'lsa bizga yordam berishga tayyor", - dedi Flik matbuot anjumanida.

Eslatib o'tamiz, "Barselona" va "Inter" o'rtasidagi birinchi yarim final uchrashuvi 3:3 hisobida yakunlangandi.