Kataloniyaning "Barselona" klubi yaqin vaqt ichida urugvaylik himoyachi Ronald Arauxo bilan xayrlashishni rejalashtirmoqda. Bu haqda Fichajes nashri xabar bermoqda.

Jurnalistlarning yozishicha, "ko'k-anorranglilar" 26 yoshli futbolchiga narx belgilagan. Kataloniyaliklar urugvaylik futbolchini sotishdan 40 million evro ishlab olmoqchi. Arauxoga da'vogarlar ro'yxatida Turinning "Yuventus", "Liverpul", Londonning "Chelsi" va "Tottenxem" klublari bor.

Ispaniya La Ligasining joriy mavsumida Ronald 7 ta o'yin o'tkazib, 1 ta gol urdi. Himoyachining "Barselona" bilan amaldagi mehnat shartnomasi muddati 2031 yilning yozida tugaydi.