"Barselona" qanot hujumchisi Lamin Yamalning holatiga mustaqil baho berish uchun chov jarohatlarini davolashga ixtisoslashgan belgiyalik taniqli shifokorga murojaat qildi. Mundo Deportivo nashrining yozishicha, klub "ko'k-anorranglilar"ning 18 yoshli yulduzi to'g'ri davolanayotganiga ishonch hosil qilmoqchi bo'lgan.

Avvalroq Yamal pubalgiya - chov sohasi surunkali shikastlanishidan aziyat chekayotgani xabar qilingandi.

Sportchilarda pulbalgiyani davolash bo'yicha uch mingdan ortiq holatni qayd etgan shifokor Yamalning ahvolini tahlil qilib, hammasi ijobiy rivojlanayotgani haqida xulosaga keldi. U "Barselona" tibbiy shtabi tomonidan belgilangan kurs, jumladan, jismoniy tayyorgarlik va fizioterapiya to'g'ri ekanligini tasdiqladi. Mutaxassisning baholashicha, jarohat erta bosqichda aniqlangan, bu esa asoratlarning oldini olish imkonini beradi.