UEFA prezidenti Aleksander Cheferin Evropa Superligasi loyihasining nihoyat barham topganiga munosabat bildirdi. So'nggi besh kun ichida loyihaning oxirgi ishtirokchilari — «Barselona» va «Real Madrid» ham undan voz kechganini e'lon qildi.

"Real" va "Barselona" yana oilamizga qo'shilganidan juda xursandman. Rostini aytsam, hammamiz bu bahs-munozaralardan charchagandik. "Real" prezidenti bilan kelishmovchiliklarimiz bo'ldi, lekin bir narsani aniqlashtirib olsak: biz hech qachon bir-birimizga bo'lgan hurmatni va o'yinga bo'lgan muhabbatimizni yo'qotmaganmiz. Bu vaziyatda yagona g'olib — futbol", — deya Cheferinning so'zlarini keltirmoqda «FOX Sports».

Ma'lumki, Superliga loyihasini Florentino Peres juda faol qo'llab-quvvatlab kelayotgan edi. Dastlab loyihani Evropaning 12 ta grand klubi boshlagan, biroq ulardan 9 tasi muxlislarning keskin noroziligidan so'ng tezda bu fikrdan voz kechgandi. Keyinroq «Yuventus», yaqinda esa Ispaniyaning ikki giganti ham Superligani tark etdi.