«Palmeyras» hujumchisi Vitor Roke «Chelsi» klubiga o'tishi mumkin.

Bolavip nashrining ma'lumotlariga ko'ra, London klubi 21 yoshli futbolchini yozgi transfer oynasida sotib olishga harakat qilib ko'rishga tayyor. «Ko'klar» forvardning transferi uchun yirik taklif tayyorlamoqda. Agar Roke yozgacha o'z formasini saqlab qolsa, «Chelsi» muzokaralarga kirishishga qaror qilgan.

Vitor Roke 2025 yilda «Barselona»dan «Palmeyras»ga 25 million evro evaziga o'tgan edi. Uning amaldagi shartnomasi 2029 yilning 31 dekabrigacha mo'ljallangan. Joriy mavsumda hujumchi Braziliya klubi safida barcha turnirlarda 13 ta o'yinda maydonga tushib, 5 ta gol urdi va bitta golli uzatmani amalga oshirdi. Transfermarkt portali Rokening bozor qiymatini 35 million evroga baholamoqda.