"Barselona" hujumchisi Rafinya Dias Braziliyadan klub ixtiyoriga qaytdi. Bu haqda Mundo Deportivo nashri xabar bermoqda.

Manba bergan ma'lumotlarga ko'ra, terma jamoa safida jarohat olgan futbolchi tiklanish jarayonini "Barselona"da davom ettiradi. Qayd etilishicha, Rafinyaning asosiy maqsadi — 10 may kuni Madridning "Real" klubiga qarshi bo'lib o'tadigan bahsgacha safga qaytish.

Joriy mavsumda 29 yoshli Rafinya barcha musobaqalarda 31 ta o'yinda maydonga tushib, 19 ta gol urdi va sakkizta golli uzatma muallifiga aylandi.

"Barselona" o'zining navbatdagi o'yinini 8 aprel kuni Madridning "Atletiko" klubiga qarshi o'tkazadi. Chempionlar Ligasi chorak finalidan o'rin olgan dastlabki uchrashuv Toshkent vaqti bilan soat 00:00 da boshlanishi rejalashtirilgan.