«Real»ning sobiq yarim himoyachisi Toni Kroos «Barselona» vingeri Lamin Yamal haqida yuqori fikr bildirdi. Nemis futbolchisining fikricha, aynan Yamal bugungi kunda dunyodagi eng iqtidorli o'yinchi hisoblanadi.

«Lamin Yamal — ayni damda jahon futbolidagi eng katta talant», — deya Kroosning so'zlarini keltiradi The Touchline nashri.

Yamal bor-yo'g'i 18 yoshda bo'lsa-da, u allaqachon «Barselona»ning asosiy jamoasi safida 147 ta rasmiy uchrashuvda maydonga tushgan. Ushbu o'yinlarda Lamin o'z hisobiga 46 ta gol va 50 ta golli uzatmani yozdirib qo'yishga ulgurdi.

Hozirda «Barselona» Ispaniya chempionati turnir jadvalida peshqadamlik qilmoqda. Ikkinchi o'rindagi «Real» esa kataloniyaliklardan etti ochko orqada qolmoqda. May oyida jamoalar o'zaro «El-Klasiko»da to'qnash kelishadi.