Madridning «Atletiko» klubi bosh murabbiyi Diego Simeone Chempionlar ligasi 1/4 finalining birinchi o'yinida (0:2) hakam Ishtvan Kovachning harakatlari ustidan «Barselona» tomonidan Evropa futbol assotsiatsiyalari ittifoqiga (UEFA) taqdim etilgan shikoyat borasida fikr bildirdi.

«Men bunga katta hurmat bilan yondashaman. Biz Madridda yashaymiz va bunday vaziyatlarga o'rganib qolganmiz. Buni tushunadiganlar uchun hamma narsa juda oddiy, shuning uchun bu bizni aslo tashvishga solmayapti», — deya Simeonening so'zlaridan iqtibos keltirmoqda AS.

Eslatib o'tamiz, o'yinning 54-daqiqasida madridliklar himoyachisi Mark Pubil darvozabon Xuan Musso unga uzatgan to'pni jarima maydonchasi ichida qo'li bilan ushlagan edi. Bosh hakam ushbu vaziyatga e'tibor qaratmadi va penalti belgilamadi.