«Barselona» hujumkor yarim himoyachisi Fermin Lopes joriy mavsumdagi gol+pas tizimida o'z ochkolarini 30 taga etkazib oldi. 22 yoshli ispaniyalik futbolchi La Liganing bugungi «Osasuna»ga qarshi bahsida (2:1) 86-daqiqada Ferran Torresga golli uzatma etkazib berdi.

Bu Fermin uchun joriy mavsumdagi barcha musobaqalardagi 30-samarali harakat bo'ldi (13 ta gol va 17 ta assist). U Lamin Yamaldan (24+18) keyin «ko'k-anorranglilar» safida ushbu ko'rsatkichga erishgan ikkinchi futbolchiga aylandi.

Hozirda «Barselona» Madridning «Real» klubini 14 ochkoga ortda qoldirmoqda. Agar yakshanba kuni «qaymoqranglilar» «Espanol»ni mag'lub eta olishmasa, Xansi Flik jamoasi muddatidan oldin chempionlikni qo'lga kiritadi.