Valverdeni yana bo‘shatishmoqchi. «Barselona»ning yangi murabbiyi kim bo‘ladi?
Ispaniya Superkubogi yarim finalida «Atletiko»dan uchralgan mag‘lubiyat tufayli kataloniyaliklar jamoasi bosh murabbiyi Ernesto Valverde iste’fo tomon yana bir qadam tashladi. Ispaniyalik taniqli jurnalist Gonsalo Miro klub rahbariyati mavsum yakunida ushbu mutaxassisni ishdan bo‘shatishga qaror qilgani haqida xabar tarqatdi.

Nimadan boshlandi?

So‘nggi kunlardagi ikki voqea «Barselona» va Valverde o‘zaro xayrlashishi haqidagi mish-mishlarni urchitdi. Payshanba kuni katalonlar yaxshi o‘ynaganiga qaramasdan Ispaniya Superkubogi yarimfinalida «Atletiko»ga yutqazib qo‘yishdi (2:3). Keyingi kuni esa Dohada Erik Abidal, Oskar Grau hamda klubning sobiq futbolchisi Xavi o‘rtasida uchrashuv bo‘lib o‘tdi.

Abidal, Grau, Xavi

Abidal — ko‘k-anorranglilar klubi futbol direktori, Grau — klubning ijrochi direktori, Xavi — «Barsa» afsonasi, u 2019 yil mayida Qatarning «As-Sadd» klubi bosh murabbiyi etib tayinlangan. Uning amaldagi shartnomasi 2021 yilgacha tuzilgan. Uning boshqaruvida jamoa Qatar chempionatida uchinchi o‘rinda bormoqda.



Uchrashuvdan maqsad

Turli ma’lumotlarga ko‘ra, Xaviga «Barselona» bosh murabbiyi bo‘lish bo‘yicha taklif berilgan, u keyingi haftadan yoki shu yil yozidan lavozimga kirishishi mumkin. U bilan dastlab 2022 yil yoziga qadar shartnoma tuzish rejalashtirilgan.

Mundo Deportivo xabariga ko‘ra, Abidal va Grau yaqin vaqt ichida Xavi bilan yana bir uchrashuv o‘tkazishadi va uni shu qishdayoq klub boshqaruvini qabul qilib olishga ko‘ndirish uchun urinib ko‘rishadi. Ayni vaqtda Valverdening taqdiri Xavining qaroriga bog‘liq, agar u klubga yozda kelishni afzal ko‘rsa, Valverde yozgacha ishlaydi va keyin o‘z ixtiyori bilan o‘rnini bo‘shatib beradi. Xavi shu qishda Kataloniyaga qaytishga rozi bo‘lsa, Valverde dushanba kuni iste’foga chiqariladi.

«As-Sadd» rahbariyati Xavi «Barsa»ga ketishi haqidagi xabarlarga munosabat bildirib, u qachondir uyiga qaytishi mumkinligini istisno etmagan holda ispaniyalik mutaxassisning qatarliklar bilan shartnomasi mavjudligini eslatgan.

Qayd etish kerakki, Xavi «Barselona»ni boshqarish – orzusi ekanini hech qachon yashirib o‘tirmagan, intervyularida bir necha marta klubga qaytish niyati borligi haqida gapirgan.

Abidal va Grau Dohada ko‘k-anorranglilar hujumchisi Usmon Dembele bilan ham uchrashgan, fransiyalik futbolchi Qatarda jarohatdan keyingi tiklanish jarayonini o‘tamoqda.