Bu o'yin anonsida klublarning pozitsiyasini ishlatsak bo'ldi, markaziyga aylanib qolarmikan? Mana: La Liganing 2 va 3-o'rinlarni egallab turgan jamoalar to'qnashuvi. Baribir vahimali eshitilmayapti. Chunki bu «Xetafe», kichik klub degan tushuncha o'rnashib qolgan. «Levante»lar, «Xetafe»lar deb qo'yamiz mensimay. Ispaniya chempionatiga o'z tish shchyotkasidek munosabatda bo'ladiganlar ko'p, ya'ni muntazam ishlatadi, lekin tolachalari qay ahvolda qarab o'tirmaydi, bu holatda «Xetafe» ancha jiddiy kuchga aylangani sezilmay ham qolishi mumkin. Biroq, «Atletiko Madrid», «Valensiya», «Sevilya» kabi klublarni ortda qoldirayotgan yigitlar ko'proq hurmatga loyiq. Aslida bu anons bir inson hikoyasi bo'lishi ham mumkin edi. Xose Bordalas quyi diviziondan kuchli uchlikkacha bo'lgan yo'lni jamoa bilan  birga bosib o'tdi. Yoshi 55 ga kirib baxti ochildi va tanildi. «Xetafe» birdan boyib qolgani ham yo'q. Hammasini shu Bordalas bir tekisda olib boryapti. Bu o'sha-o'sha kichik klub. Faqat to'g'ri uynayapti. Uslub Kike Senten «Barselona»siga teskari. To'p raqibga beriladi, qarshi xujumda jazolanadi. Shu tariqa «Xetafe» so'ngi 4 uchrashuvda 4 g'alaba qayd etdi va ularda birorta gol o'tkazib yubormadi. Endigi manzil "Kamp Nou", «Xetafe» tumani aholisining yarmi sig'adigan stadion («Xetafe»da 173.000 aholi yashaydi). «Barselona» ichki muammolar girdobida ham bir kirishsa bunday jamoalarga joyini ko'rsatib qo'yishi mumkin, albatta. Buning uchun kuch nuqtai nazaridan yondoshishi kerak. Seten bunga tayyormi? Ana shuni tomosha qilish qiziqarli. Qolganini efir orqali gaplashamiz! Davron Fayziev.