Bugungi eng muhim o‘yinlar haqida.
Bugun 20 oktyabr sanasi. Ushbu kunda sayyoramizning bir qator qiziqarli uchrashuvlari bo‘lib o‘tadi. Biz ularning orasidan eng qiziqarlilarini tanlab oldik. Asosan ko‘proq e’tiborga molik, keskin va kurashlarga boy bo‘ladigan va tomoshabop futbol bo‘lishi kutilgan o‘yinlarni saralab oldik.
"Monako" - "Renn"
Frantsiya Liga 1 musobaqasining 9-turida "Monako" o‘z uyida "Renn" klubini qabul qiladi. Ushbu bahsning qiziq tomoni shundaki, "Monako" mavsumni ko‘ngildagidek boshlay olmadi va natijalar qoniqarsiz tarzda, turninr jadvalining 18-pog‘onasini egallab turibdi. Aslida anchagina kuchaytirilgan tarkibga ega bo‘lgan klub uchun bu mos kelmaydigan o‘rin hisoblanadi. "Renn" jamoasi PSJ klubiga bosh og‘riq bo‘ladigan Frantsiyaning kam sonli jamoalaridan biri sanaladi. Xo‘sh, "Monako" bu safar ham yutqazadimi, yoki "Renn" jamoasi ochko yo‘qotadimi? Bugun shunday qiziqarli uchrashuv bo‘lib o‘tadi.
"Manchester Yunayted" - "Liverpul"
Bugungi kunning eng muhim o‘yini. Nafaqat Angliyada, balki butun er yuzida millionlab muxlislarning e’tibor markazida bo‘ladigan bellashuv hujumkor va gollarga boy bo‘lishi odatiy holat. APLning 8 ta turidan so‘ng, MYu o‘ziga yarashmagan 14-o‘rinni egallab turgan bo‘lsa, "Liverpul" barcha o‘yinlarda raqiblarini dog‘da qoldirib kelmoqda. Ammo ikkala klub o‘zaro o‘ynaganda natijalar bir chekkaga surilib, barcha e’tibor o‘yinga qaratiladi. Jamoalar faqat g‘alaba haqida o‘ylashadi. Faqatgina kunning, turning, haftaning emas, balki mavsumning eng qiziqarli o‘yinlaridan biri ekanligi sir emas.
"Sassuolo" - "Inter"
Butun dunyoda "Inter" klubining bir qator muxlislarini uchratishimiz mumkin. Jamoaning har bir o‘yinini intizorlik bilan kutadiganlar bor. Boz ustiga joriy mavsum jamoa tarkibini anchagina kuchaytirib olgan va chiroyli o‘yinlarni, natijalarni qayd etmoqda. Yaqinda yorug‘ olamni tark etgan "Sassuolo" prezidenti jamoani quyli ligalardan qay tarzda olib chiqqani, klubni o‘sishi uchun katta hissasini qo‘shib ketgani haqida xabar bergan edik. Og‘ir judolikka uchragan klub bugun katta sinovdan o‘tadi, ya’ni "Inter"ni qabul qiladi.
"Lechche" - "Milan"
Qoniqarsiz natijalardan so‘ng, "Milan" bosh murabbiyini almashtirdi. Yangi boshqaruvchining qo‘l ostida jamoa bugun debyut qiladi. Milanliklarni ham jahonda millionlab muxlislari bor ekanligi tabiiy holat. Ko‘ramiz, Piolining ilk o‘yini qanday natija bilan yakuniga etarkan. Har holda, "Milan" 7 ta uchrashuvning 4 tasida mag‘lubiyatga uchradi va 9 ochko bilan turnir jadvalining 11-pog‘onasini egallab turibdi.
Gana - Burkina Faso
Afrika millatlar ligasi saralash bosqichida Gana terma jamoasi Burkina Fasoni qabul qiladi. Ushbu bahsning e’tiborga molik tomoni shundaki, birinchi o‘yinda ganaliklar mehmonda 1:0 hisobida mag‘lubiyatga uchrashgan edi. Bugun o‘z uylarida javob o‘yinini o‘tkazishadi. Gana terma jamoasining imkoniyatlarini va qanday kuchli ekanligini barchamiz yaxshi bilamiz. Burkina Faso ham so‘nggi yillarda anchagina o‘sishga erishgan. Bugun Gana o‘ziga kerakli natijani qayd eta oladimi yoki yo‘qmi uchrashuv yakindan so‘ng, bilib olamiz.