​​Ikki imkoniyat

"Napoli" prezidenti Aurelio De Laurentis shu paytga qadar neapolliklar amalda bir necha yillardan buyon "Yuve" bilan skudetto uchun kurash olib borgan bo'lsada, hech qachon mavsum avvalida uning jamoasi chempionlik uchun kurashishini ochiqchasiga tan olmagan. 2019/20-yilgi mavsum boshida esa De Laurentis murabbiy Karlo Anchelottining tajribasiga va yangi xarid qilingan futbolchilarga tayanib "Napoli" chempionlik uchun kurashishini rasman e'lon qildi. Yakunda esa klub o'rtamiyona jamoalarga qarshi o'yinlarda ham qimmatli ochkolarni yo'qotib chempionlik uyoqda tursin yevrokuboklar uchun kurashdan ham uzoqlashib ketdi. Jamoa asosini tashkil etadigan futbolchilarga (Mertens, Kalyexon, Insinye, Allan, TOP klublar qiziqishida bo'lib turgan Ruis va Kulibali) noprofessional yondashuvni ko'rgan Anchelotti esa futbolchilar tomonida turdi va buni oqibatida iste'foga chiqarildi. Uning o'rnini egallagan Jennaro Gattuzo esa vaziyatni to'liq anglaguniga qadar 3ta o'yinda imkoniyat boy berildi. Hammasiga sabab futbolchilarning motivatsiyasi edi. "Parma", "Fiorentina", "Lechche"ga qarshi uchrashuvlarda mag'lub bo'lgan "Napoli" orada "Yuventus"ni, kubokda esa "Latsio" va "Inter"ni taslim etishga muvaffaq bo'ldi. Gap motivatsiyada ekanini aniqlagan Rino endi faqat o'yinga tayyor bo'lganlarnigina maydonga tushirishini shogirdlariga tushuntirib qo'ydi. Allan bo'ladimi u Kulibalimi farqi yo'q. U shu orqali futbolchilarni tarbiyalamoqda... Jamoa joriy mavsum YECHL uchun raqobatdan chiqib ketdi. "Napoli" oldida ikkita yo'l qoldi. Italiya kubogi, Chempionlar ligasi...

"Barselona" ham raqibi singari holatni boshidan o'tkazdi. Murabbiy o'zgardi, ichki nizolar ommaga tarqab ketdi. Biroq De Laurentisdan farqli ravishda Xosep Bartameoning kirdikorlarini to'liq bilmay qoldik va "Barsa" chempionlik kurashidan uzoqlashib ketgani yo'q. Sababi "Real" va "Atletiko" ham bu mavsum beqaror o'yin ko'rsatmoqda. Lekin kataloniyaliklarning asosiy umidi Messi bo'lajak bahsdan oldin super formada ekanini ko'rsatib qo'ydi va 4ta tur davom etgan golsiz seriyasiga poker bilan javob berdi. "Barselona" muxlislarini quvontirgan yana bir jihat jamoa o'yinida ham sekin bo'lsada yaxshi tomonga o'zgarish kuzatilmoqda. Kike Setyen imzosi sezilyapti. Klub bo'lajak o'yinga va el klasikoga Ispaniya chempionati peshqadami sifatida tashrif buyurishini ham eslab o'tish kerak. Biroq kadrlar muammosiga e'tibor qaratish lozim. Suares, Dembele, Alba ortidan Roberto ham "Napoli" va "Real"ga qarshi uchrashuvlarni o'tkazib yuboradi. Shu sabab bu ikki to'qnashuvda biz qanotlarda Firpo va Semedu harakatiga guvoh bo'lamiz. Breytueytni YECHLda maydonga tusha olmasligini yaxshi bilasiz. Shu sabab hujumda faqat Grizmann, Fati va Messi qolmoqda xolos. Demak, Setyenda tanlov katta emas. "Barselona" Ispaniya kubogidan chiqib ketganini inobatga olsak, kataloniyaliklarda ham raqib singari ikkita kubokni yutish imkoniyati qolmoqda. La Liga va o'zini sog'intirib qo'ygan Chempionlar ligasi...

Shu tomonlama olib qarasak, bir biriga o'xshash kayfiyatdagi ikki jamoaning tarixda ilk bor "San Paulo"dagi kurashiga guvoh bo'lamiz.