Bilasiz, 1 aprel hazil kuni bo'lganligi tufayli ko'plab do'stlar, og'ayni va aka-ukalar bir-biriga yaxshi ma'noda ko'plab hazillar qilishadi.

Shu munosabat bilan bugungi kun tarixidagi voqealarni, unutilmas hazil va undagi samimiyat ko'pchilik tomonidan to'g'ri qabul qilinadi.

Ko'plab klublar aynan shu kuni feyk, hazilomuz tarzda yirik transfer yoki shov-shuvli xabarlarni e'lon qilishadi. Biz esa bunday harakatdan foydalanmagan holda hazil kuniga bag'ishlangan AGMK futbolchisi Sanjar Tursunov bilan bog'liq voqeani e'tiboringizga taqdim qilamiz.

"Ukrainadagi faoliyatimda "Vorskla"da o'ynab yurgan kezlarimda bir yosh futbolchiga hazil qilganim hamon yodimda. Endi yoshlar jamoasidan asosiy tarkibga o'tib, o'yinlarda ishtirok etishni boshlagan futbolchini oldimga chaqirdim va uni bosh murabbiy izlayotganini aytib, oxirgi o'yinlardagi harakati yoqqani va u bilan yaxshilangan tartibda yangi shartnoma, ya'ni maosh masalasida gaplashmoqchi bo'layotganini ta'kidladim. U esa xursand holda shoshib murabbiy xonasiga yo'l oldi. Oradan biroz vaqt o'tgach murabbiy va futbolchi xonadan chiqishdi. Ichkarida nima bo'lganini aniq bilmadim-u, lekin hazil kuni bo'lgani tufayli buni murabbiy to'g'ri tushungandi. Rosa kulgu bo'lgandi o'sha voqea", — deya 1 aprel kuni bilan bog'liq hazilini esladi Sanjar Tursunov.