Kataloniyaliklar seshanba kuni sobiq prezident Jozep Bartomeuning ishlaridan so'ng klubning moliyaviy holati tahlilini taqdim etishdi. Unda bir qiziq jihat ma'lum bo'ldi, "ko'k-anorranglilar" 2019 yilda "Atletiko"ga 15 million evro to'lashgan.

Bu mablag' himoyachi Xose Ximenesning transferi uchun o'ziga xos avans bo'lgan.

"Barsa" 2019 yilda himoyachi Matteys de Ligt bilan shartnoma imzolamoqchi edi, ammo agent Mino Rayolaning 20 mln evrolik komissiyasi sabab buni rad etgandi.

Shundan so'ng klub Ximenesga e'tiborini qaratdi. Ammo, "Barsa" 2019 yilda forvard Antuan Grizmann uchun "Atletiko"ga 120 mln evro to'ladi va ikki bitimni birga amalga oshira olmadi.

Shu sabab "Barselona" Madrid klubiga kelajakda Ximenesning transferini kafolatlash uchun 15 mln evro to'ladi. Bitimda shuningdek Xose jarohat olsa, o'rniga boshqa o'yinchi bilan shartnoma imzolash belgilab qo'yildi.

Transfer koronavirus sabab kelib chiqqan "Barselona"ning moliyaviy qiyinchiliklari tufayli amalga oshmadi.