Evropa Chempionlar Ligasining final uchrashuvida “Manchester Siti” “Inter” bilan to'qnash kelib, kichik hisobda g'alaba qozongan holda bosh sovrinni qo'lga kiritdi. «Manchester Siti» turnirning joriy mavsumida birorta o'yinda ham yutqazmadi. Xosep Gvardiola jamoasi guruh bosqichida «Borussiya» (2:1, 0:0), «Sevilya» (4:0, 3:1), va «Kopengagen» (5:0, 0:0) bilan bahslarda 14 ochko jamg'argan bo'lsa, pley-offda «Leyptsig» (1:1, 7:0), «Bavariya» (3:0, 1:1) va «Real» (1:1, 4:0) qarshi uy-safar shaklidagi ikki o'yinlarda bittadan durang va bittadan (yirik hisobdagi) g'alabaga erishdi. «Manchester Siti» Evropa chempionlar ligasi / Evropa chempionlari kubogi musobaqalari tarixida bir mavsumni mag'lubiyatsiz o'tkazib, yakunda chempionga aylangan o'ninchi jamoa bo'ldi. Avval bunday natijani «Milan», «Ayaks», «Liverpul», «Manchester Yunayted» (ikki martadan), «Bavariya», «Barselona», «Inter», «Marsel» va «Tsrvena Zvezde» (bir martadan) qayd etishgandi.