"Napoli" Pyotr Zelinskini Chempionlar ligasi uchun qaydnomadan chiqarib yubordi.

Shuningdek, bir necha kun oldin "Aston Villa"dan ijara asosida o'tgan "Napoli"ning yangi futbolchisi Leander Dendonker ham turnir o'yinlari uchun qaydnomaga kiritilmagan. Qolgan yangi futbolchilar - vinger Siril Ngonj, himoyachi Paskuale Matstsokki va yarim himoyachi Xamed Traore ro'yxatga kiritildi.

Chempionlar ligasining 1/8 finalida "Napoli" "Barselona" bilan o'ynaydi. Jamoa ilk o'yinni o'z maydonida o'tkazadi, u o'yin 21 fevral kuni bo'lib o'tadi.

Zelinski yozda "Napoli"ni erkin agent sifatida tark etib, "Inter"ga o'tishga yaqin turibdi. La Gazzetta dello Sport xabariga ko'ra, futbolchi allaqachon "neradzurrilar" bilan to'liq kelishuvga erishgan - faqat hujjat masalalarni hal qilish kerak.