"Barselona" himoyachisi Jyul Kunde jamoaning hozirgi bosh murabbiy Xans-Diter Flik qo'l ostidagi o'yini haqida gapirdi.

Kataloniyaliklar Ispaniya Kubogining yarim final javob uchrashuvida Madridning "Atletiko" jamoasidan ustun keldi (1:0) va final yo'llanmasini qo'lga kiritdi. "Ko'k-anorranglilar" ikki o'yinlik qarama-qarshilik natijasiga ko'ra, "matraschilar"ni umumiy 5:4 hisobida mag'lub etishdi.

"Biz Flikning uslubini tushunamiz, bizga bunday futbol yoqadi. Biz murabbiy bilan doimo o'yindan zavq olish qanchalik muhimligi haqida gaplashamiz. Futboldan zavqlansang, muvaffaqiyatga erishish osonroq bo'ladi," - dedi Kunde o'yindan keyingi intervyusida.