«Xetafe» bosh murabbiyi Xose Bordalas Madridning «Real» klubi ustidan qozonilgan sensatsion g'alabadan so'ng o'z fikrlarini bildirdi. La Liganing 26-turi doirasida 2 mart kuni bo'lib o'tgan uchrashuv 1:0 hisobida mehmonlar foydasiga hal bo'ldi.

«Peshqadamlik uchun kurashayotgan «Real» ustidan qozonilgan ushbu juda muhim g'alabani qadrlashimiz kerak. O'yin uchun tuzilgan reja ideal darajada ish berdi. Bu aynan men istagan narsa: g'alaba mentalitetiga ega, safarga yo'l olib, hafta davomida ustida ishlagan rejalarimizni hayotga tatbiq eta oladigan jamoa», — deya Bordalasning so'zlaridan iqtibos keltiradi Marca.

«Bernabeu»da g'alaba qozonish har kimning ham qo'lidan kelmasligini hammamiz bilamiz. Biz tarixdagi eng yaxshi klublardan biri haqida gapiryapmiz. Qiynalishimizga to'g'ri kelishini bilardik. Birinchi bo'limda, qarshi hujumlarda biroz xotirjamroq harakat qilganimizda, madridliklarga ko'proq muammo tug'dirgan bo'lardik. Ammo baribir juda faxrlanaman. Raqib vaziyatlar yaratishini bilardik, lekin ular odatdagidan kamroq bo'ldi. Yigitlarni tabriklayman, ular istalgan joyda va istalgan raqibni mag'lub etishga qodir. Aynan shunga ishonish kerak».

Shuningdek, Bordalas jamoa xavfli hududdan uzoqlashgan bo'lsa-da, mavsum uchun belgilangan maqsadga erishish yo'lida hali hech narsa qilinmaganini ta'kidladi. Hozirda «Xetafe» hisobida 32 ochko mavjud va jamoa turnir jadvalida o'n birinchi o'rinni egallab turibdi. «Real» 60 ochko bilan ikkinchi, «Barselona»da esa 4 ochko ko'p.