«Manchester Siti» hujumchisi Erling Xoland o'z kelajagi borasida muhim qarorga keldi. El Nacional nashrining xabar berishicha, norvegiyalik to'purar o'z agenti Rafaela Pimentadan boshqa klublar bilan muzokaralarni to'xtatishni so'ragan. Xoland kamida 2027 yilning yoziga qadar ingliz klubida qoladigan bo'ldi. O'sha vaqtga kelib, uning shartnomasidagi tovon puli miqdori taxminan 150 million evrogacha tushadi.

Manbaga ko'ra, Xoland «Barselona» uning transferini moliyaviy jihatdan amalga oshira oladigan vaqtni kutmoqchi. Joriy yilda bunday transferning iloji yo'q. Erling yana bir yil kutishga tayyor va 2027 yilda «ko'k-anorranglilar» uni sotib olishiga umid qilmoqda.

Qayd etilishicha, Xolandni Xans-Diter Flik loyihasi o'ziga jalb etgan. Norvegiyalik futbolchi Lamin Yamal va Rafinya bilan birgalikda hujumkor uchlikni tashkil etishni istamoqda.

Avvalroq, Erling Xolandning nomi Madridning «Real» klubi bilan bog'lab kelinayotgan edi.