Ispaniya qirollik futbol federatsiyasi prezidenti Luis Rubiales La liganing 2019/2020 yilgi mavsumni yakunlash borasida rejalari bilan o'rtoqlashdi.
«Barcha sport musobaqalari to'xtatilgan. Hozircha yangi sana haqida o'ylamayapmiz va taxmin qilmaymiz. Munosib vaqt kelganida ushbu masala muhokama qilinadi. Ammo hozir aniq sanani belgilamoqchi emasmiz. Jamiyat normal hayotga qaytganida, o'shanda bu haqda gaplashamiz. Futbolchilarga eng yaxshi sharoitlarda o'ynash imkoniyatini berishimiz kerak. Hozircha rejalar haqida gapira olmayman. Bashorat bilan shug'ullanishni yoqtirmayman. Qurbonlar ko'p. Mavsumni qayta boshlashning aniq sanasini belgilay olmaymiz.
Qanday bo'lmasin mavsumni yakunlashimiz kerak, lekin buning keyingi mavsumga ham ta'siri bo'lishi kerak emas. Maqsadimiz — mavsumni yakunlash. Biz shunchaki klublarni Segundaga yubora olmaymiz, Segundadan jamoalarni La ligaga ko'tara olmaymiz. Ular buni haqli ravishda qo'lga kiritishlari kerak. Mamlakat tiklanganidan keyin mavsum oxiriga etkaziladi. Mavsumni may oyida qayta boshlashning iloji yo'q. Ammo bu mavzuda adashgan bo'lishimni istardim. Aks holda taqvimni cho'zishga to'g'ri keladi. Maqsad — mavsumni saqlab qolish. Bu bizning g'oyamiz. Qaysi jamoa g'olib chiqishi, qaysi jamoa yutqazishidan qat'i nazar, bu ish maydonda hal bo'lishi kerak», — dedi Rubiales "Marca" nashriga bergan intervyusida.