«Barselona» hujumchisi Lionel Messi Ispaniya chempionatining 34-turidan o'rin olgan «Vilyarreal»ga qarshi o'yinda (4:1) ikkita golga uzatma berdi. Natijada argentinalik futbolchining La liganing joriy mavsumidagi assistlari soni 19taga etdi. Shu tariqa, Messi Ispaniya chempionatining bir mavsumidagi golli uzatmalari soni bo'yicha shaxsiy rekordini yangiladi. Leo 2010/11 va 2014/15 mavsumlarda 18 marta jamoadoshlarining goliga assistentlik vazifasini bajargan edi. Messi La liganing joriy mavsumida 29ta o'yinda maydonga tushib, 22ta gol urdi va 19ta golga uzatma berdi. Chempionat tugashiga 4ta tur qolganida «Barselona» peshqadam «Real»dan 4 ochko ortda qolmoqda.