Joriy mavsumda Gavi "Barselona" safida 100 ta o'yin o'tkazgan tarixidagi eng yosh futbolchiga aylanishi mumkin. U 2021 yilning avgustidagi debyutidan beri klub safida 75 ta o'yinda maydonga tushdi.

Ajablanarlisi, 100ta o'yin o'tkazgan eng yosh kataloniyalik futbolchi hozirda Leo Messi emas. Bir paytlar juda iqtidorli ko'ringan Boyan Krkich bu marraga ispaniyalik 19 yoshu 2 oylik bo'lganida erishgan. Keyingi o'rinda Pedri, u 100-o'yin vaqtida 20 yoshda edi. Messi esa kuchli uchlikni yopadi - argentinalik futbolchi 20 yoshu 8 oy va 3 kunligida “blaugrana” safidagi 100-uchrashuvini o'tkazgan.

Ammo Gavi uchalasini ham ortda qoldira oladi! Hozir yarim himoyachi 18 yoshda, u avgust oyida 19 yoshga to'ladi. Agar u La Liganing qolgan barcha o'yinlarida (20), shuningdek, Qirollik Kubogi va Evropa Ligasida ishtirok etsa, mavsum oxirigacha "ko'k-anorranglilar" futbolkasida 100-o'yinini o'tkazishi mumkin.