Kataloniya klubida maosh muvozanati qanday? Avvalo, aytish kerak, Serxio Buskets va Jordi Alba ketishganidan so'ng maosh «xalta»si nisbatan vazn yo'qotadi, biroq jamoaning eng ko'p va kam ish haqiga ega futbolchilari o'rtasidagi «jarlik» yo'qolib qolmaydi, baribir.

ENG KAM MAOSh KIMLARGA TEGIShLI?

Juda kutilmagan holat - ayni payt «Barselona»da eng minimal maosh Alexandro Baldega tegishli. Uning yillik ish haqi 80 ming evroga teng - arzimas summa. Hattoki, notanish Pablo Torre ham yiliga 100 ming evro oladi. Eng kam maoshga ega 10 nafar futbolchi ro'yxatida boshqa kutilmagan ism-familiyalar ham bor. Deylik, klub sardorlari Mark-Andre ter Shtegen va Serxi Roberto. Qolaversa, dunyoning eng yaxshi markaziy himoyachilaridan biri Ronald Arauxo ham shu ro'yxatda.

«Barselona»ning eng kam maosh oluvchi futbolchilari (soliq to'lovlaridan keyingi summa)

1. Alexandro Balde - yiliga 80 ming evro

2. Pablo Torre - yiliga 100 ming evro

3. Arnau Tenas - yiliga 170 ming evro

4. Inyaki Pena - yiliga 1,5 million evro

5. Serxi Roberto - yiliga 2,4 million evro

6. Erik Garsiya - yiliga 2,8 million evro

7. Markos Alonso - yiliga 3 million evro

8. Gavi - yiliga 3,2 million evro

9. Ronald Arauxo - yiliga 3,3 million evro

10. Mark-Andre ter Shtegen - yiliga 4,3 million evro

ENG KO'P MAOSh KIMLARGA TEGIShLI?

Tushunarliki, Jordi Alba va Serxio Busketsning ketishlari «Barsa»ga maosh xarajatini biroz to'g'rilash imkonini beradi. Chunki ikki faxriy yakunlangan mavsum klubning eng ko'p maosh oluvchi futbolchilari ro'yxatida kuchli uchlikdan joy oldi. Ma'lumki, «blaugrana» keyingi mavsum uchun yangi futbolchilar bilan shartnoma tuzish va ularni ro'yxatdan o'tkazish yo'lida maosh chiqimini sezilarli darajada kamaytirishi kerak. Buskets va Albasiz «Barselona»ning eng ko'p maosh oluvchi futbolchilari ro'yxati ham o'zgaradi, albatta. Ya'ni niderlandiyalik Frenki de Yong 18 «limon» bilan etakchiga aylanib oladi. Aytgancha, insayder Fabritsio Romanoning yozishicha, Alba «Barselona»ga qiyin moliyaviy holatda yordam berishni xohlagani uchun ketishga qaror qildi.

«Barselona»ning eng ko'p maosh oluvchi futbolchilari (soliq to'lovlaridan keyingi summa)

1. Frenki de Yong - 18 million evro

2. Robert Levandovski - 10 million evro

3. Ansu Fati - 6,7 million evro

4. Jyul Kunde - 6,5 million evro

5. Rafinya - 6 million evro

6. Usmon Dembele - 5,76 million evro

7. Ferran Torres - 4,8 million evro

8. Pedri - 4,5 million evro