Britaniyalik muxlislar Jud Bellingemning "El Klasiko"dagi ilk uchrashuvini tomosha qila olmaydi.

"Barselona" va "Real Madrid" o'rtasidagi uchrashuv erta boshlanishi sababli Angliyada translyatsiya qilinmaydi.

AS nashrining eslatishicha, Buyuk Britaniyada shanba kunlari mahalliy vaqt bilan soat 14:45 dan 17:15 gacha o'yinlarni translyatsiya qilishni taqiqlovchi qonun mavjud. Ushbu qonun odamlarni stadionlarga borishga undaydi - Buyuk Britaniyada o'yinlarning aksariyati shanba kuni bo'lib o'tadi.

"Barselona" - "Real" uchrashuvi 28 oktyabr kuni Buyuk Britaniya vaqti bilan 15:15 (Toshkent vaqti bilan 19:15) da boshlanadi.

Aytish joizki, bu qonun Buyuk Britaniyada 60-yillardan beri amalda. U kamida 2029 yilgacha amal qiladi.