"Barselona" uchun Markus Reshfordning to'liq transferini "Manchester Yunayted"dan amalga oshirish oson kechmaydi.

Avvalroq Ispaniyadagi manbalar "qizil iblislar" 28 yoshli futbolchini sotib olish narxi bo'yicha "ko'k-anorranglilar"ga yon bermasligini ma'lum qilgan edi — ijara shartnomasida ko'rsatilganidek, faqat 30 mln evro. Endilikda ushbu ma'lumotni Angliyada ham tasdiqlashdi: jurnalist Kris Uilerning so'zlariga ko'ra, "Manchester Yunayted" hatto "Barselona" chegirma so'rab turib olsa ham, Reshfordning narxini aslo tushirmaydi.

"Transfermarkt" portali Markus Reshfordni 40 mln evroga baholamoqda. Joriy mavsumda ingliz futbolchisi Xans-Diter Flik jamoasi safida 34 ta o'yinda maydonga tushib, 10 ta gol va 13 ta assist qayd etdi.